هنا قصة تاريخيه لا تنسى أبداً قصيده تحكي واقع ماجد مع الهلال لا تفوتكـ ادخل وشوف

بسم الله الرحمن الرحيم
السلام عليكم ورحمة الله وبركاته ،،،، وبعد :

أهداء مني إلى جمهور الشمس الكبير قصيده من الارشيف محتفظ فيها من بعد الثلاثة الشهيره على كأس خادم الحرمين الشريفين عام 1415 هـ وللأمانه القصيدة باسم مستعار في ذلك الوقت (( نصراوي الشمال )) يعني هالقصيده انا محتفظ فيها بغرفتي اكثر من خمسة عشر عاماً وتوي اتذكرها وحبيت ان القصيده تحكي لكم بعض من قصص ماجد مع نادي الزعيق الذي لا يمكن ان ينسى شي أسمه ماجد أبداً وهذه حقيقه لا خيال وإلى الآن وماجد كابوس الأزيرق فلله دركـ يا كابتن ماجد وإليكم القصيدة وهي بعنوان :

(( الموينع وبرنامج مع الناس ))

هذي عوايد نصرنا يرفع الراس
وليا بغا له شي لازم ينوله
في ساعة التتويج حنا هل الكاس
وليا قضت جولة بدينا بجوله
الفوز ماهو بالجرايد بقرطاس
يبغى عمل مخلص وفن ورجوله
والرمح الأسمر للملايين نبراس
يستاهل التصفيق لو صفقو له
ليا وقف قلنا كتم كل الانفاس
وليا ركض حتى الهلام هتفو له
وليا أخترق يجلى عن القلب الاحساس
وليا أرتقى نجم العرب من يطوله
منه الموينع داخل القول محتاس
ينخى دفاعه والدفاع افزعوا له
تجمعوا تفرقوا صاروا اسداس
تكتلوا تبعثروا وافتحوا له
تكاثروا تناقصوا صابهم ياس
تمددوا بالقاع واستسلموا له
تليفوا وبطونهم مثل الأقواس
حقٍٍِِ على الفارس يضمر خيوله
مع السلامه فاتهم تقل نسناس
رجله على قطع المسافه عجوله
أكبودهم من زايد الركض يباس
صوت لهم بهجا ولا ناظروا له
يحدهم والراس ماله عن الفاس
عنده كلام كل مرة يقوله
تجمهروا تعاقبوا عقب الافلاس
كلن يقول أنت السبب في دخوله
لاباس يا منصور لا باس لا باس
قبلكـ أبو أشواق ضيع نعوله
هذي ماهي شلة جبرتي وعباس
هذا عمل ماجد وهذي فعوله
زمان تراه بروسكم تقل هوجاس
تصفحوا تاريخكم وأرجعوا له
وأن كان مرتكم برامج مع الناس
سووا مع العيسى لقا وأشتكوا له
قولوا ذبحنا واحد(ن) ماله أجناس
معروف في شكله ورقمه وزوله
الجوهرة زين بها عقد الألماس
والأصفر البراق نجم البطوله
يا نصر أحبك حب من غير مقياس
حب من أيام الصغر والطفوله

وسلامتكمـ وصح لسان الشاعر للأمانه منقول من صاحب الأسم المستعار ( نصراوي الشمال ) في عام 1415 هـ ولكم خالص تحياتي

اخوكم : إبراهيم الشمري (( شمس أيدير ))

توقيع :

هنا قصة تاريخيه لا تنسى أبداً قصيده تحكي واقع ماجد مع الهلال لا تفوتكـ ادخل وشوف 1f42ad2b1b

التعديل الأخير تم بواسطة شمس ايدير ; يوم أمس الساعة 09:54 AM.

مع تحياتي نصراوي حتي الموت ونبقي ردود لاحد يحرمنا من ردودكم والله ولي التوفيق

» مدرب الهلال البلجيكي ايريك جيريتس يغادر لبلاده